دي مش مصر
هي دي مصر؟؟؟؟؟!!!!!!! هذا الكم من الفساد 00 وهذه الحركة الدءوبة لتخريب مصر000والتي نجحت في بيع مصر00 كل شئ للبيع 00 حتى الأمن القومي ؟!! كان زمان بيلهوا الشعب بحاجة 00 مشروع قومي مثلا 00 الوحدة العربية 00 السد العالي 00 إزالة آثار العدوان 00 لاشئ يعلو فوق صوت المعركة 00 الانفتاح 00 دلوقت مافيش أي حاجة 00 الشعب مايستاهلش00 مش كفاية انهم قبلوا يحكمونا 00 احنا مش مؤهلين للديموقراطية 00 لسة مابلغناش رشدنا 00 الاسلاميين حايضحكوا علينا ويضللونا ويخلونا ننتخبهم 00 زي حماس 00 وحزب العدالة في تركيا 00 لكن على مين 00 داحنا اللي بدعنا الفرعنة 00 الشعب لازم يتأدب 00 بيقولوا الشعب سلبي وبيقاطع الانتخابات 00 ولما يتشجع ويروح عشان يدلى بصوته يضربوه بالجزم 00 لأنه أكيد جاي ينتخب الأعداء 00 بيتفننوا في التنغيص على الشعب 00 كل كام يوم مصيبة 00 ومابيستحوش 00 والله كارثة واحدة من كوارثهم تقلب أجدع دولة 00 لكن مابيهمهمش 00 مافيش حد بيحاسب 00 مجلس الشعب متنقي عالفرازة 00وخيال المآته أقصد مجلس الشورى شرحه وزيادة 00 والصحف القومية مستعدة تشرشح للصبح لو حد استجرى ووجه نقد للمعصوم 00 فيه دولة تستعين بالبلطجية؟؟؟؟؟!!!!! مش كفاية الأجهزة الأمنية اللي كاتمة على نفسنا 00 أمن دولة وأمن مركزي وأمن عام 000 وأمن ماعامش 00 وكمان بلطجية ومعتادي إجرام 00 ومع ذلك اسمه الحزب الوطنى الديموقراطي 00 طيب عندي اقتراح يمكن يريحهم ويريحنا 00 خدوا الحكم 00 الرئاسة00 والوزارة00 ومجلسي الشعب والشورى 00 وخدوا كمان الصحافة والاعلام 00 بس ماتخربوش مصر 00 ماتسرطنوش الشعب 00 ماتبيعوهاش للأعداء 00 اسرقوا اللي تسرقوه 00 بس بلاش تذلوا المواطن 00 احنا نبطل سياسة وانتم بطلوا فساد 00 أليس لكم ملك مصر وهذه الأنهار تجري من تحتكم 00 اقتراح أهبل00 صح؟ طيب نعمل ايه فيكم ؟ انتخابات مش نافع 00 مظاهرات مش نافع 00 بالعقل مش نافع 00 بالقضاة مش نافع 00 حتى موريتانيا مش نافع 00 مربطينها عالآخر 00ربنا عالمفتري 00مش دي مصر اللي نعرفها 00 وانتم مش مصريين 0
تعليقات